Пасхальныя віншаванні ад сястры Чаславы

Хрыстос Уваскрос! Сапраўды Уваскрос!

Дарагія бацькі нашых дзетак, супрацоўнікі і сябры Місіі Добрага Самараніна!
Ад усяго сэрца віншую Вас са Святам Пасхі!

Час пандэміі, вайны, агромністай міграцыі, пераследу, эканамічнага і маральнага крызісу паказвае наш духоўны стан, дапамагае ўсвядоміць кім мы сапраўды з’яўляемся і адказаць на некаторыя важныя жыццёвыя пытанні:
Ці знайшлі мы хвіліну, каб наведаць Хрыста ў нашых святынях у Вялікі Чацвер, калі Ён быў “зачынены ў вязніцы”?
Ці памаліліся пры яго магіле ў Вялікую Пятніцу?
Ці сёння з чыстым сумленнем можам заспяваць радаснае Аллелюя?

Неаднойчы мы наракаем на складанасць часу, які перажываем, хочам імгненнага вырашэння ўсіх праблем, прагнем перамен, але ці мы да іх гатовы? У жыцццёвым змаганні вельмі часта разлічваем толькі на свае сілы, хоць можа і ўсведамляем сваю няздольнасць прыняць пэўны цяжар.

Таму хочацца ўсім нам пажадаць, каб мы з поўнай моцай запрасілі ў сваё жыццё Уваскрослага Хрыста, які здолее ўсё перамяніць і напоўніць нас мужнасцю, адвагаю, прабачэннем і любоўю!
Хрыстос Уваскрос!

З дарам малітвы за ўсіх Вас пры пустой магіле Хрыста,
с. Часлава.