Місія Добрага Самараніна адзначыла ўрачыстасць св. Уршулі Ледухоўскай

29 мая Касцёл успамінае вялікую святую, якая прысвяціла сваё жыццё выхаванню дзяцей, святую Уршулю Ледухоўскую.

У Місіі Добрага Самараніна святую Імшу цэлебраваў арцыбіскуп Тадэвуш Кандрусевіч. Падчас гаміліі іерарх разважаў пра жыццё і дзейнасць апякункі нашай Місіі, а таксама пра яе харызму, якая і надалей трывае ў Касцёле. Арцыбіскуп падкрэсліў, што хрысціянскае выхаванне дзяцей і моладзі, пра якое клапоцяцца сёстры і супрацоўнікі Місіі Добрага Самараніна, з’яўляецца моцным падмуркам, пабудаваным на Хрысце. Напрыканцы Эўхарыстыі Арцыбіскуп падарыў Місіі Евангеліярый і гадзіннік.

У наступнай частцы святкавання адбыўся інклюзіўны спектакль пра жыццё св. Уршулі Ледухоўскай. Незвычайным было тое, што акторамі ў спектаклі былі дзеці, якія наведваюць Місію, выхавацелі, а таксама асобы з абмежаванымі магчымасцямі здароўя з супольнасці “Самаранін”. Свята было спалучана з заканчэннем катэхетычнага году, таму выпускнікі Місіі атрымалі таксама дыпломы і падарункі.

Святая Уршуля, маліся за нас!