Адбылася творчая сустрэча “Аксана Аракчэева збірае сяброў!”
15 траўня ў бібліятэцы Хрысціянскага Сацыяльнага Цэнтра сабраліся прыхільнікі творчасці Аксаны Аракчэевай. Удзельнікі творчай сустрэчы даведаліся пра кніжныя навінкі, паглядзелі арыгінальныя малюнкі, атрымалі аўтографы, пагрузіліся ў цудоўны свет мастацтва і зарадзіліся добрым настроем. Пашанцавала таксама папіць гарбату ў творчай кампаніі з тортам па эскізе мастачкі, які яна аформіла проста на вачах удзельнікаў паводле сваёй кнігі.
Топ-5 цікавых фактаў пра Аксану Аракчэеву:
1. Не ведае, што такое сумны настрой. Яна сама і яе творы напоўнены сонцам і радасцю.
2. Аформіла больш за 60 кніг, пазнавальных і любімых дзеткамі: “Прыгоды мышкі Пік-Пік” Людмілы Рублеўскай,” “Брык і Шуся” Таццяны Сівец, ”Мяне завуць Лахнеска” Алены Масла, “Сад з матылькамі” Тамары Бунта, “Закаханы трэцякласнік” Уладзіміра Ліпскага, “Таямніцы нашага садка” Васіля Дранько-Майсюка і інш.
3. Напісала больш за сто жывапісных партрэтаў (Францыска Скарыны, Уладзіміра Караткевіча, Янкі Купалы, Тадэвуша Кандрусевіча і інш.)
4. Стварыла кнігі пра свайго любімага сабачку, дзе выступае мастачкай і пісьменніцай адначасова: “Фанечка” (2020) і “Фанечка: мандарынавая гісторыя” (2021).
5. З’яўляецца дачкой і паслядоўніцай Барыса Аракчэева, аднаго з заснавальнікаў сучаснай беларускай школы жывапісу, заслужанага дзеяча мастацтваў. Спрыяла з’яўленню кнігі ўспамінаў “Барыс Аракчэеў. Бэз малюецца на шчасце”, прысвечанай жыццю і творчасці мастака.
Усе фота захапляльнай сустрэчы можна паглядзець у альбоме.