Адбыліся “Каціныя чытанні” ў бібліятэцы
У чэрвені ў бібліятэцы Місіі адбыліся чытанні кніжных навінак пра катоў. Спачатку пачыталі каляровую празаічную кнігу “Казкі ката Грамапападомуса”, а пасля чорна-белую вершаваную “У ката Мірона чорная карона”.
Новую кнігу для маленькіх “Казкі ката Грамапападомуса” дзіцячых пісьменнікаў Васіля Леўскага і Мікалая Васілеўскага праілюстравала мастачка Аксана Аракчэева. Здавалася, што назва кнігі складаная, і дзеткі не змогуць выгаварыць імя ката. Аднак, усё было наадварот, юныя кніжнікі запомнілі і паўтаралі адразу! Дзеткі слухалі з інтарэсам пра ката, які можа размаўляць па-чалавечы, і разглядалі малюнкі. Пасля кожны ўдзельнік заняткаў маляваў свайго жыхара Кашкаландыі.
Новая кніга Рыгора Барадуліна “У ката Мірона чорная карона” з чорна-белымі літарамі і малюнкамі складаецца з вершыкаў пра катоў і котак. “Лічылку-цапалку” вельмі ўпадабалі! Ілюстрацыі стварыў мастак Міхась Дайлідаў. Маляваць толькі адным колерам сумна? Зусім не! Дзеткі спрабавалі перадаць прыгажосць і настрой чорнымі лініямі.
Усе фотаздымкі з “Каціных чытанняў” глядзіце ў альбоме.
У чэрвені таксама ў межах майстар-класа з Марыяй Каралёвай малявалі ката Фіндуса і іншых герояў шведскіх дзіцячых кніг, чыталі і малявалі як вялікі Марк Шагал, глядзелі спектакль паводле кнігі “Птушка ўва мне ляціць, куды захоча”.