З 4 па 14 ліпеня ў Місіі Добрага Самараніна адбываўся другі тур летніка “Вакацыі з Богам“. Для дзетак была арганізавана праграма пад назвай “Падарожжа па старонках Бібліі”. Дзевяць дзён супольнага адпачынку прайшлі насычана, весела і карысна! Удзельнікі летніка знаёміліся з героямі Біблійных гісторый, маліліся, праслаўлялі Бога праз супольную творчую дзейнасць. Дзеткі бралі ўдзел у цікавых творчых сустрэчах і майстар-класах, спазнавалі сябе праз трэнінгавыя заняткі, наведалі Мінскі планетарый і Мінскі музей гарадскога пасажырскага транспарту. І, канешне, усіх удзельнікаў штодзённа чакаў актыўны адпачынак на свежым паветры, гульні і забавы ў добрай кампаніі.
Дзеткі весела бавілі час разам з любімымі героямі Фіндусам і Пэтсана. Інтэрактыўная пастаноўка па кнізе “Блінны торт” Свэна Нурдквіста з гульнямі, спевамі і рухамі падарыла дзеткам шмат радасці і весялосці.
Разьбяр Віктар Дудкевіч з Глыбокага прыехаў у Місію, каб падзяліцца сваімі ведамі з дзеткамі па гісторыі цацак і традыцыі іх вырабу, гісторыі пісьма і пачатку кнігадрукавання. Удзельнікі сустрэчы мелі магчымасць пагуляць з драўлянымі цацкамі, папісаць на васковых таблічках і падрукаваць на міні-варштаце.
Ценевы лялечны спектакль па матывах кнігі “Кразі – чырвоны кракадзільчык” вучыў дзетак сябраваць, развіваць уяўленні пра сябе, здольнасць разумець іншых і ўменні ладзіць адносіны.
На занятках па кнізе “Скарына дзеткам” удзельнікі “вандравалі” разам з першадрукаром і даведаліся, дзе ён нарадзіўся, вучыўся і друкаваў. Увесь гэты шлях быў звязаны з галоўнай справай Скарыны – друкам кніг Бібліі. Вынікам заняткаў сталі новыя веды, створаныя дзеткамі яркія тытульныя старонкі кніг Бібліі і партрэты Скарыны.
У бібліятэцы дзеткі чыталі самую марскую кнігу – “Вялікія прыгоды Какоса Маракоса” Сержа Мінскевіча. Галоўны герой Какос упаў з пальмы i паплыў. Ад Акулы ўцёк, ад Рыбы–Пiлы, ад Кальмарыка, ад Баракуды – зусiм як марскi Калабок! Пабываў у Антарктыдзе, вярнуўся зноў у цёплыя краi, дзе на цудоўным востраве прарос пальмай. Дзеткі слухалі казку-паэму і размалёўвалі марскіх жывёлінаў.
Выніковым мерапрыемствам другога туру летніка стаў тэатралізаваны аповед “Пра добрага бліжняга”. Дзеткі самі сталі акторамі і расказалі сваім сябрам і бацькам, якія прыйшлі паглядзець пастаноўку, пра дабрыню і дапамогу бліжняму. Дзеткі прадэманстравалі, што рука дапамогі заўсёды каму-небудзь неабходная, і трэба яе працягваць, бо любы з нас можа апынуцца ў складанай жыццёвай сітуацыі. Фінальны вечар прайшоў у цёплай і сяброўскай атмасферы. Дзеткі атрымалі падарункі на ўспамін, а таксама смачны пачастунак.
Чытайце таксама, як адбыўся чэрвеньскі летнік пад назвай “Пілігрым – чалавек творчы”.
У жніўні летнік працягнецца! Чытайце пра ўсе туры летніка “Вакацыі з Богам”, бо кожны мае цікавую і ўнікальную праграму.
Да сустрэчы ў Місіі Добрага Самараніна!
Падрабязнасці па тэлефонах: +375 (17) 343-99-17 / +375 (44) 770 09 01
E-mail: samaranin16@gmail.com
Будзем удзячныя за ахвяраванні, якія можна пералічыць на рахунак:
Банкаўскія рэквізіты:
УНП 102366022, АКПА 380087195000
р/р BY63UNBS30151611900000001933
ЗАТ “БСБ Банк”; БІК UNBSBY2X
Альбо падтрымаць наз праз сістэму Web-pay.