Дзеткі Місіі паўдзельнічалі ў стварэнні батлеечнага спектакля
У Хрысціянскім Сацыяльным Цэнтры адбылася серыя батлеечных спектакляў ад тэатральна-мастацкай студыі “Мірская батлейка”. Важна, што дзеткі мелі магчымасць не толькі паглядзець спектаклі, а і самі паўдзельнічаць у стварэнні пастаноўкі “Гусіная песня”. Юныя ўдзельнікі змаглі на ўласным досведзе адчуць спецыфіку батлеечнага тэатра.
Расказвае батлеечніца і педагог спадарыня Ганна Ракіцкая:
“Спектакль “Гусіная песня” прысвечаны княгіне Ганне Радзівіл, якая з’яўляецца пакравіцелькай нашай тэатральна-мастацкай студыі. Яна фундавала ў вёсцы Нова Воля царкву ў гонар Нараджэння Божай Маці, фінансавала каранаванне Жыровіцкага абраза Маці Божай. З яе ініцыятывы адкрываліся школы для падрыхтоўкі мастакоў і рамеснікаў, будаваліся масты, дарогі, млыны, заводзілася жывёла галандскіх парод. Ганна Радзівіл адкрыла шэраг мануфактур, якія выраблялі рэдкія для тых часоў шкляныя і люстраныя вырабы, фаянс і фарфор. Яна клапацілася пра стварэнне бібліятэк, партрэтнай галерэі Радзівілаў, упарадкавала архівы роду. Пэўны час княгіня праводзіла ў Міры, што спрыяла не толькі адраджэнню тутэйшага замка, а таксама росквіту мястэчка і наваколля. Падчас заняткаў і рэпетыцый дзеткі пазнаёміліся з эпохай і гістарычнымі асобамі, імправізавалі, спявалі, малявалі і ляпілі з гліны. Атрымалася “пагружэнне” ў гісторыю праз гульні і творчасць“.
Усе фота з рэпетыцый глядзіце ў альбоме.
Фота са спектакляў і заняткаў глядзіце таксама тут:
- Студыя-тэатр “Мірская батлейка” распачала серыю лялечных спектакляў “Радзівіліяда”
- Спектакль “Ад Рыма да Міра” — для самых маленькіх.
- Архітэктура барока: заняткі ў бібліятэцы.