Мы любім казкі!

У наш летнік завітаў актор і казачнік​ Віталь Халадок, які расказаў дзеткам​ пра ролю казак у сваім жыцці і пачытаў свае аўтарскія казкі.

“Першыя​ беларускія​ казкі​ я​ пачуў​ ад​ сваёй​ бабулі. А яшчэ ў дзяцінстве ў мяне быў маленькі радыёпрыёмнік, які я вельмі любіў слухаць. Аднойчы ўвечары пачуў перадачу з казкамі, якая мяне вельмі ўразіла.​ Калі я​ вырас і стаў акторам,​ мяне запрасілі на “Радыё-Мінск” у перадачу “Казачка на добры сон”.​ На​ працягу адзінаццаці​ гадоў у эфіры радыё я​ кожны вечар расказваў дзеткам добрыя павучальныя казкі. Пачынаў так:​ “Прывітанне, мае маленькія, зноў з вамі я, ваш неўтаймаваны летуценнік Віталь Падарожны”.

Спадар Віталь​ сам піша казкі, якія друкаваліся​ на старонках дзіцячага часопіса “Качели”. Частка з іх – пераапрацоўка бабуліных расказаў.​ Удзельнікі сустрэчы мелі магчымасць паслухаць казкі, а таксама разам прыдумаць сваю ўнікальную казачную гісторыю і праілюстраваць яе. З вядомым акторам гэта было асабліва цікава і весела!