Па слядах Усяслава Чарадзея!
Летнік Місіі накіраваўся ў месца з даўняй гісторыяй – сядзібу-музей “Стары Менск”. Музей знаходзіцца недалёка ад замчышча Х стагоддзя, дзе пачынаўся і першыя два стагоддзі знаходзіўся Менск. Замчышча памятае крокі самаго Усяслава Чарадзея! Навукоўцы перакананы, што Менску не менш за 1100 гадоў, і гэта адна з найстарэйшых сталіц Еўропы. Першыя два стагоддзі сваёй гісторыі горад месціўся тут, а пасля быў перанесены на Нямігу.
У музейнай экспазіцыі юныя наведвальнікі пабачылі арыгінальныя прадметы, знойдзеныя падчас археалагічных раскопак, якія паказваюць культуру і побыт нашых продкаў тысячагадовай даўніны, у тым ліку старажытныя рэлігійныя прадметы. Большасць экспанатаў датуюцца Х-ХІ стагоддзямі – часам росквіту Менска на Менцы.
Дзетак чакала інтэрактыўная экскурсія-гульня “Дружына Усяслава Чарадзея”. Яны паўдзельнічалі ў рыцарскіх забавах, майстар-класе па беларускіх танцах, віктарыне і прысвячэнні ў дружыннікі Усяслава Чарадзея.
100 фотаздымкаў з нашай гістарычнай вандроўкі глядзіце ў альбоме Сядзіба-музей “Стары Менск”.