“Птушка ўва мне ляціць…”
У бібліятэцы Місіі дзеткі ўтульна ўладкаваліся, каб пачытаць і абмеркаваць кнігу “Птушка ўва мне ляціць, куды захоча” шведскай пісьменніцы і мастачкі Сары Лундберг.
Выданне ў 2018 годзе было прызнана найлепшай кнігай года ў Швецыі, а ў 2019 годзе яна была выдадзена на беларускай мове. Гэта гісторыя пра дзяўчынку, якая нягледзячы на складанасці, не губляла любоў да жыцця, здольнасць бачыць прыгожае і мару стаць мастачкай. Кніга была натхнёная жыццём і дзённікамі шведскай мастачкі Бэрты Хансан.
Дзеткі разважалі над сур’ёзнымі пытаннямі:
- Што рабіць, калі не жадаеш жыць так, як чакаюць ад цябе іншыя?
- Што рабіць, калі дарослыя не разумеюць цябе?
- Што рабіць, калі атрымаць мастацкую адукацыю надзвычай складана, асабліва дзяўчынцы з простай сялянскай сям’і, а ты больш за ўсё на свеце любіш маляваць і марыш стаць мастачкай?
Гераіня кнігі адважна і ўпэўнена рэалізоўвае сваю мару!
Кнігу цікава не толькі чытаць і слухаць, а таксама разглядаць. У ёй больш за сто ілюстрацый!
Юным чытачам было прапанавана паўдзельнічаць у творчым заданні па кнізе. Дзеткі засяродзіліся на фрагменце, дзе школьны настаўнік вучыць маляваць моркву. Ён робіць
на аркушы контурныя рыскі і раіць не залазіць за іх. Морквы ў вычняў атрымліваюцца роўненькія і аднолькавыя. Бэрта ўяўляла моркву на агародзе і была ўпэўнена, што яна зусім іншая. Але настаўнік не дазваляў праяўляць ініцыятыву і фантазію.
Удзельнікі бібліятэчнай сустрэчы імправізавалі і стваралі свае ўнікальныя морквы без шаблонаў. Якія морквы атрымаліся, запрашаем паглядзець у фотаальбоме.
Кнігу “Птушка ўва мне ляціць, куды захоча”, а таксама яшчэ каля 50 кніг вядомых шведскіх аўтараў на беларускай і шведскай мовах, можна пачытаць у бібліятэцы Хрысціянскага Сацыяльнага Цэнтра.
У летніку Місіі дзеткі мелі магчымасць паглядзець спектакль паводле кнігі “Птушка ўва мне ляціць, куды захоча” ў выкананні тэатра лялек, света і ценю “Дом Сонца”.