“Скарына дзеткам”

У летніку “Вакацыі з Богам” адбыліся заняткі па кнізе​ “Скарына дзеткам”. Гэтую кніжку​ можна не толькі чытаць, таксама ў ёй можна (і нават трэба!) пісаць і​ маляваць.​ Акрамя тэкста ў кнізе, якая з’яўляецца своеасаблівым творчым сшыткам,​ змешчана 25 цікавых заданняў пра беларускага першадрукара Францішка Скарыну. Дзіцячае выданне багатае размалёўкамі, крыжаванкамі ды іншым “інтэрактывам”. Удзельнікі заняткаў “вандравалі” разам з Францішкам па карце Еўропы і даведаліся, дзе ён нарадзіўся, вучыўся і друкаваў.​ Увесь гэты шлях быў звязаны з галоўнай справай Скарыны – друкам кніг Бібліі.

Эпоха кнігадрукавання ў Еўропе пачалася з выхаду ў свет Бібліі Іагана Гутэнберга на лацінскай мове. У другой палове XV стагоддзя лацінскія пераклады Бібліі друкаваліся ў многіх гарадах Заходняй Еўропы. У той жа час Кнігу кніг пачалі перакладаць і выдаваць на нацыянальных мовах.​ Біблія, падрыхтаваная і выдадзеная Францішкам Скарынам, асаблівая, пра што сведчаць структура выдання, мастацкае афармленне, аўтарскі шрыфт, пераклад тэксту. На занятках дзеткі даведаліся, як працаваў наборшчык тэксту,​ ці мелі кнігі Скарыны тытульныя старонкі, навошта ён размясціў у выданні свой партрэт.​ Творчыя заданні дапамаглі ўдзельнікам лёгка засвоіць тэму.​ Вынікам заняткаў​ сталі новыя веды, добры настрой і створаныя дзеткамі яркія тытульныя старонкі кніг​ Бібліі і​ партрэты Скарыны.