Ці хацелі б вы мець робата, які ўсё робіць за вас?
У бібліятэцы Хрысціянскага Сацыяльнага Цэнтра дзеткі чыталі кнігу “Штуковіна” вядомага шведскага пісьменніка Марцiна Вiдмарка. Перад прачытаннем на пытанне: “Дзеткі, ці хацелі б вы мець робата, які вучыць за вас урокі, прыбірае пакой, падае сняданак?”, удзельнікі адразу адказалі: “Так!” Але пасля прачытання кнігі іх меркаванне значна змянілася.
У кнізе расказваецца гісторыя пра двух братоў, якія жывуць спакойным жыццём, падзяліўшы абавязкі: Рутгер – вынаходнік, Вальтар – займаецца хатняй гаспадаркай. І вось аднойчы апошняму прыходзіць у галаву думка: ці не змайстраваў бы Рутгер нейкую штуковіну, каб тая дапамагала з хатнімі справамі? Створаны маленькі Памагатар пачынае выконваць усю працу і становіцца выдатным памочнікам. Але паступова ён пачынае вучыць братоў, што ім есці і як ім жыць…
Удзельнікі бібліятэчнай сустрэчы разважалі і малявалі Памагатараў. Фотаздымкі бібліятэчных заняткаў глядзіце ў фотаальбоме “Бібліятэчныя чытанні”.
Кнігу “Штуковіна”, а таксама яшчэ каля 50 кніг вядомых шведскіх аўтараў на беларускай і шведскай мовах, можна пачытаць у бібліятэцы Хрысціянскага Сацыяльнага Цэнтра.