Заняткі па кнізе “Скарына дзеткам”

У бібліятэцы​ Хрысціянскага Сацыяльнага Цэнтра​ адбыўся цыкл сустрэч па кнізе “Скарына дзеткам”.​ Кніга знаёміць​ з самым​ яркім і вядомым прадстаўніком беларускай культуры​ – Францішкам Скарынам. Сам першадрукар у кнізе расказвае, дзе ён нарадзіўся, навучаўся, як зацікавіўся кнігадрукам і пачаў сам​ друкаваць кнігі Бібліі. Заданні пасля кожнай часткі дапамагаюць замацаваць набытыя веды, а таксама творча асэнсаваць матэрыял.

На занятках удзельнікі​ здзівіліся, што Скарына быў не толькі першадрукаром, а таксама лекарам, садоўнікам,​ перакладчыкам і нават паэтам. Разам чыталі верш і паставілі міні-спектакль па творы. Дзеткі з радасцю выконвалі​ ролі звяроў, птушак, рыб і пчол.​ Юных кнігазнаўцаў уразілі “рухомыя літары” – металічныя літары, якія наборшчык тэкста выкладваў радок за радком на наборную дошку​ ў люстраным выглядзе. Удзельнікі паспрабавалі​ напісаць тэкст, як бы ён выглядаў у металічным наборы. І гэта было няпроста!​

Вядома, дзетак зацікавіў партрэт першадрукара. На гравюры Скарына паказаны ў часе перакладу Бібліі​ за невялікім сталом з разгорнутай кнігай.​ Вакол Скарыны розныя рэчы: і кнігі, і пясочны гадзіннік, і “глобус Сусвету” ды іншыя прадметы. Лепшы спосаб разглядзець усе дэталі​ – размаляваць партрэт. Гэтым юныя мастакі з радасцю займаліся!​

Дзе можна сустрэць Скарыну сёння? На вуліцах,​ у​ музеях, у літаратуры, кіно, жывапісе, скульптуры, графіцы і нават ў метро. Удзельнікі расфарбоўвалі Нацыянальную бібліятэку Беларусі і малявалі помнік Скарыну перад будынкам, а таксама стваралі “скарынаўскі” вагон мінскага метро.

Аўтаркі кнігі Тацяна Сапега і Марыя Каралёва прадставілі кнігу​ не толькі​ для дзетак, а таксама для​ дарослых. Кнігазнаўца Тацяна расказала, як з’явілася ідэя стварэння кніжкі ў форме творчага сшытка з заданнямі. Мастачка Марыя падзялілася, як адбываўся творчы працэс пошуку вобраза Скарыны і паказала свае эскізы, якія былі створаны падчас падрыхтоўкі кнігі. Усе ахтотныя атрымалі аўтографы.

Для арганізацыі заняткаў, а таксама для папаўнення бібліятэкі новымі кнігамі мы будзем удзячныя за дабравольныя ахвяраванні, якія можна пералічыць на рахунак:

Банкаўскія рэквізіты:
УНП 102366022,
АКПА 380087195000
р/р BY63UNBS30151611900000001933
ЗАТ “БСБ Банк”;
БІК UNBSBY2X