Адбылося сапраўднае свята міласэрнасці для дзетак
15 красавіка, напярэдадні нядзелі Божай Міласэрнасці, у Хрысціянскім Сацыяльным Цэнтры адбылася Малітва праслаўлення “Дзеці нясуць міласэрнасць”. Гэта фестываль духоўных спеваў, дыялог любові, праслаўлення і падзякі Пану Богу. Праслаўляць – гэта як удыхаць чыстае паветра: яно ачышчае душу, дазваляе не заставацца ў няволі складанага моманту і цемры цяжкасцей, надае сілаў, надзеі і прыносіць сапраўдную радасць. Перажываючы свята міласэрнасці, якім з’яўляецца наш фестываль, мы просім, каб людское сэрца перамянілася, а Касцёл стаў цэнтрам культу Божай міласэрнасці.
На пачатку малітвы да сабраных звярнулася сястра Часлава Навіцкая USJK, якая разважала пра найкаштоўнейшы Божы дар, дадзены чалавеку, – гэта дар жыцця. Яна падкрэсліла, што пасля Бога мы павінны шанаваць сваіх бацькоў, якія нам далі жыццё, і заклікала разам дзякаваць Богу за дар жыцця і маліцца, просячы аб Божай Міласэрнасці для ўсяго свету. “Нішто так не перамагае зло, як Божая міласэрнасць. Моц міласэрнасці здольна пераменіць трагедыі сучаснага свету і сэрца кожнага чалавека”.
Пасля словаў сястры Чаславы да сабраных выйшаў ксёндз Аляксандр Шамрыцкі МІС з манстрацыяй у руках, у якой знаходзіўся сам Пан Езус у Найсвяцейшым Сакрамэнце.
Удзельнікамі Малітвы праслаўлення “Дзеці нясуць міласэрнасць” сталі музычныя гурты, ансамблі і хоры з розных гарадоў Беларусі:
- Гурт “Міхаэлькі” парафіі Маці Божай Ружанцовай (Мінск)
- Дзіцячы ансамбль TRANSITUS парафіі святога Францішка (Мінск)
- Дзiцячы хор Дабрачыннай Місіі Добрага Самараніна пад апекай святой Уршулі Ледухоўскай (Мінск)
- Дзiцячы хор парафii Нараджэння Найсвяцейшай Панны Марыі (Гомель)
- Гурт “Нябесныя ноткі” парафіі святога Яна Хрысціцеля (Мінск)
- Міраслаў Шабановіч з парафіі Найсвяцейшай Тройцы (св. Роха) на Залатой Горцы (Мінск)
- Гурт “Пухавіцкія пярлінкі” парафіі святога Антонія (Мар’іна Горка)
- Хор “Божыя Ягняткі” парафіі святога Яна Евангеліста (Мінск)
- Дзіцячы хор “Зорачкі” парафіі святога Антонія (Слуцк)
- Інструментальны ансамбль Санктуарыя Маці Божай Фацімскай (Жодзіна)
- Дзiцячы хор парафіі Унебаўзяцця Насвяцейшай Панны Марыі (Мазыр)
- Дзіцячы хор “Зярняткі” парафіі cвятога Казіміра (Маладзечна)
- Дзіцячы гурт “Amici Deus” парафіі святога Казіміра (Стоўбцы)
- Дзіцячая група хору “Пілігрымы” мінскага праваслаўнага прыходу ў гонар святой княгіні Вольгі (Мінск)
Для ўдзельнікаў фестываля былі падрыхтаваны спеўнікі. Усе прысутныя мелі магчымасць актыўна далучыцца да супольнай малітвы праслаўлення. Малітоўныя спевы, якія выконвалі дзеткі, гучалі асабліва пранікнёна і кранальна.
Заканчэннем малітвы праслаўлення стала песня “Малітва за Беларусь”, якую заспявалі разам дзеткі і дарослыя. Падчас малітвы праслаўлення дзеці трымалі ў сваіх руках каляровыя кветкі, а на заканчэнне малітвы склалі іх да алтара.
На малітве прысутнічаў арцыбіскуп Тадэвуш Кандрусевіч, які звярнуўся да сабраных і выказаў шчырую радасць бачыць у Хрысціянскім Сацыяльным Цэнтры шмат дзетак: “Вы – будучыня нашай Айчыны і будучыня Касцёла. Яна будзе радаснай і светлай, калі мы будзем яе будаваць на хрысціянскіх каштоўнасцях”.
Пасля абеду, на які былі запрошаныя ўсе прысутныя, для дзетак і бацькоў была падрыхтавана забаўляльная праграма. Пад гукі скрыпкі і бубна можна было патанчыць беларускія народныя танцы. Дзеткі актыўна ўдзельнічалі ў майстар-класах: “Малюем з Аксанай Аракчэевай”, дзе можна было памаляваць са знакамітай мастачкай, і “Макаронныя пацеркі”, падчас якога можна было зрабіць упрыгожванні з рознакаляровых макарон. Наймалодшыя ўдзельнікі гулялі з клоўнам, пускаючы мыльныя бурбалкі.
Алена Шымак, кіраўнік хора “Божыя Ягняткі” расказала: “Гэта ўнікальная падзея. Акрамя велізарнага духоўнага сэнсу малітоўная сустрэча мае практычнае значэнне для хора, дзе можна падзяліцца сваім служэннем і пачарпнуць вопыт тых, хто, як і мы, славіць Бога ў парафіяльных супольнасцях”. Самі ўдзельнікі выказалі свае ўражанні ад сустрэчы: “Гэта было самае-самае крутое свята Божай Міласэрнасці на ўсім белым свеце. Было вельмі здорава, таму што мы былі разам, мы спявалі і таму што мы — Божыя ягняткі”.
Выказваем шчырую падзяку ўсім удзельнікам Малітвы праслаўлення “Дзеці нясуць міласэрнасць”!
Шмат прыгожых фота глядзіце ў альбоме “Дзеці нясуць міласэрнасць”.
Будзем удзячныя Вам за ахвяраванні, якія дапамогуць у арганізацыі такіх мерапрыемстваў:
Банкаўскія рэквізіты:
УНП 102366022, АКПА 380087195000
р/р BY63UNBS30151611900000001933
ЗАТ “БСБ Банк”; БІК UNBSBY2X