Раратняя святая Імша
6 снежня, ва ўспамін святога Мікалая, арцыбіскуп Тадэвуш Кандрусевіч узначаліў цэлебрацыю Раратняй святой Імшы ў Хрысціянскім Сацыяльным Цэнтры.
Арцыбіскуп падкрэсліў, што перадусім святы Мікалай перадае нам, сучасным хрысціянам, адну заўсёды актуальную праўду. Ён сваім узорам нагадвае пра неабходнасць шчодра дапамагаць бліжнім.
Распачаўся Адвэнт, таму традыцыйна ў нас адбываюцца Рараты – адмысловыя святыя Імшы ў гонар Найсвяцейшай Панны Марыі. Распачынаючы святую Імшу ў паўзмроку, з запаленымі свечкамі ў руках, мы просім, каб Марыя дапамагла нам жыць паводле свайго прыкладу і добра падрыхтавацца да святаў Божага Нараджэння. Для дзетак гэтая святая служба асабліва чароўная і ўражлівая: у капліцы пагашана святло, толькі гараць запаленыя раратнія ліхтарыкі і свечкі. Але не толькі дзеткі любяць Рараты. Дарослыя таксама падкрэсліваюць, што Раратнія святыя Імшы маюць штосьці незвычайнае, нетыповае для нашай штодзённасці, што можа даць адпачынак для сэрца, розуму і для душы.
У нашай капліцы створаны адвэнтавыя дэкарацыі, якія маюць адмысловую сімволіку. Чатыры свечкі – чатыры тыдні чакання Божага Нараджэння. Чаканне – у гэтым слове змяшчаецца самы глыбокі сэнс Адвэнту. Спачатку запальваецца толькі адна з чатырох свечак у калядным вянку. Але з кожным тыднем святла становіцца болей. Вялікая белая раратняя свечка з’яўляецца сімвалам Марыі як ранішняй зоркі збаўлення.
У перыяд Адвэнту варта пастарацца браць удзел у Раратніх Імшах. Гэта дапаможа напоўніць перыяд Адвэнту духам чування і малітвы, каб праз заступніцтва Панны Марыі годна падрыхтавацца да сустрэчы Збаўцы ў святкаванні Божага Нараджэння
У нашай Місіі Раратнія Імшы на працягу Адвэнту адбываюцца два разы на тыдзень:
- панядзелак 8:40
- серада 17:00