Парафіяльны Моладзевы баль прайшоў у Хрысціянскім Сацыяльным Цэнтры
24 красавіка маладыя вернікі парафіі святога Яна Евангеліста і святога Максімільяна Кольбэ ў Мінску разам са сваімі душпастырамі, ксяндзамі хрыстусоўцамі, сабраліся на першы Моладзевы баль, які прайшоў у Хрысціянскім сацыяльным цэнтры.
Як адзначаецца на сайце парафіі jan.by, натхненнем для правядзення гэтага незвычайнага мерапрыемства стаў Сямейны баль, арганізаваны ўвесну мінулага года сужэнствамі руху Equipes Notre-Dame, у якім прыняла ўдзел частка моладзі.
Жаданне і ініцыятыву моладзі падтрымалі душпастыры. Ксёндз Уладзімір Марушэўскі SChr кажа:
“Баль стаў сапраўдным святам, таму што ўсе ўдзельнікі пастараліся. Наша моладзь адзначылася адказнасцю і творчасцю. Я ганаруся нашай моладдзю. Асобна шчыра дзякую сужэнству Алены і Валерыя Шымак за вялікае сэрца і высілак у сумеснай арганізацыі свята і яго правядзенні. Гэта было шыкоўна і здорава!”
Да балю, які доўжыўся шэсць гадзін, маладыя ўдзельнікі рыхтаваліся загадзя. Ім удалося развучыць больш за дваццаць бальных танцаў, сярод якіх былі паланэз, вальс, полька і іншыя.
На заканчэнне балю кожны з удзельнікаў атрымаў невялікі падарунак, а пасля ўсе разам, сабраныя ў адзінае кола сяброў, падзякавалі Пану Богу за цудоўны вечар і выказалі надзею, што гэты баль стане пачаткам новай прыгожай традыцыі маладой парафіі.
/ /